Rúa Sánchez Bregua (II)

J. Sellier | I Catálogo da colección de postais do arquivo do Concello da Coruña

José Sánchez Bregua, nado na Coruña en 1818 e morto en Madrid en 1897, foi un militar e político galego.

Era de familia humilde e entrou no exército coma soldado raso, en 1835, loitando contra os carlistas na primeira guerra civil. Dende 1844 ata 1850 estivo coma alférez en Filipinas, e en 1852 ascendeu a capitán.

Durante a guerra de África desempeñou o negociado de campaña no Ministerio da Guerra, e, a partir de entón, grazas as súas dotes como militar e organizador, a súa carreira foi rápida e brilante. En 1868 ascendeu a xeneral de división.

Foi Subsecretario da Guerra con Prim, e á morte deste, Capitán Xeneral de Galicia. Neste último cargo reprimiu persoalmente a insurrección federal do Arseal de Ferrol, polo que foi ascendido a tenente xeneral.

Foi Ministro de Guerra no Gabinete de Castelar. Era ministro, polo tanto, ao producirse o Golpe de Estado do xeneral Pavía. Despois da Restauración desempeñou diversos cargos, e en 1881 foi nomeado senador vitalicio.

Foi soterrado na Coruña o 20 de xuño de 1897. A gravación do seu enterro, coñecida como Entierro del General Sánchez Bregua, está considerada o primeiro filme cinematográfico rodado en Galicia, se ben a cinta non se conserva.

Fonte: Wikipedia