In memoriam: ALBERTO MARTÍ VILLARDEFRANCOS

Hai algo máis dunha semana nos deixaba un dos grandes fotógrafos coruñeses dos últimos 50 anos: Alberto Martí Villardefrancos (Santiago de Compostela 14-03-1922 - Coruña 29-09-2017).

No noso arquivo ficaban pendentes estas imaxes nas que o podemos ver canda diversas autoridades dos '90 do pasado século, instantáneas que foron recollidas nun libro que compila unha das mútliples exposicións que realizou ao longo da súa dilatada carreira profesional.

Que a terra lle sexa leve. D. E. P.

Inauguración do mercado municipal de Monte Alto en 1986

AAVC La Coruña en 8 mm (1964-1967)

AAVC  La Coruña en 8 mm (1964) from IB CINEMA Motion Picture Films on Vimeo.

Filmacións da mocidade de Luís Carreras-Presas y Vian, en 8 mm, dixitalizadas de xeito amateur polo autor, de grande interese histórico por ser imaxes da Coruña filmadas entre 1964 e 1967.
___________________________________________

Fonte

A Quella do Lagar vista desde Juan Flórez

Alberto Martí | La Voz de Galicia

Non é a primeira vez que falamos neste blog desta estreita rúa peonal que servía para subir desde Juan Flórez até o Parque de Santa Margarida antes de que remataran a rúa Cabo Santiago Gómez e que logo sería parcialmente soterrada baixo os cimentos da Torre Trébol.

Hoxe podemos ollar como era o seu acceso desde o antigo Camiño Novo xusto antes de que comezaran as obras do skyline coruñés.

Vista aérea desde Labañou

Alberto Martí | La Voz de Galicia

Nada que ver esta imaxe do barrio de Labañou coa actual aínda que si se distinguen bastantes construcións que permanecen en pé: as cocheiras da Cía. de Tranvías, o colexio-residencia Calvo Sotelo, o antigo refuxio Padre Rubinos, ou as humildes vivendas unifamiliares máis os bloques do que popularmente se coñecen como "casas de Franco" e que na rúa deron en chamar (tamén na cultura popular) 'Korea'.

O que por sorte non sobrevivu foi o vertedoiro de RSU que se pode adiviñar na marxe inferior dereita, onde chegaron a erguer unha estrutura de formigón a xeito de rampla para -con camións- tirar lixo directamente ao mar.

A igrexa dos PP. Xesuítas a comezos do s. XX

III Catálogo da colección de postais do arquivo do Concello da Coruña

Unha desas vellas postais en cor que tecnicamente coido que nin se poden cualificar como foto, porén non deixa de ofrecer un par de curiosos datos: o pináculo da igrexa aínda non fora construído e así esta amosaba unha imaxe semellante á dos seus últimos días de vida; na esquina inferior dereita, un valado de madeira pecha o soar no que aínda estaba por erguer o Banco de España.

Acceso ás cocheiras do tranvía de mulas

I Catálogo da colección de postais do arquivo do Concello da Coruña

E despois dunha fin de semana tan 'noventeiro', que mellor ca un superclásico para nos comezar a semana?

O noso protagonista de hoxe non gozou do carisma dos hoteis Atlantic ou Palace, non foi o Castelo de San Diego nin a igrexa dos PP. Xesuítas, porén aposto que os máis de vós sabedes onde se atopaba este fermoso predio que servía como depósito para a frota do transporte público urbano de comezos do século XX.

Por se aínda queda alguén que non o soubera (comentarámolo aquí hai poucos días), que se entere que antes da Delegación de Facenda e do Centro de Saúde San Xosé, no paseo marítimo, a cabalo entre Riazor e Orzán, se erguía esta construción que poderiamos cualificar como "industrial", aínda que hoxe ben podería elegantemente prestar calquera outro tipo de servizo.

Como moitas outras veces, por desgraza, unha mágoa!

Construción da torre de control marítimo

A Praza Elíptica en 1996

Blog del Barrio de Los Rosales

Resulta que os máis cativos tamén se fan maiores. Cando botara a andar este blog tamén circulaba pola Rede un blog veciñal sobre o barrio dos Rosales (hoxe non imos entrar na cuestión toponímica) , que contaba cun gran número de seguidores doutras zonas da cidade, entre os que se encontraba o que escribe. De aí procede esta imaxe. 

Unha mágoa que decidiran (máis ben se visen obrigados a) deixalo, desde aquí aproveito para mandar unha aperta a Xoteño e cía. e convidalos a deixar algún comentario/anécdota sobre a imaxe, na que se pode ollar a estrutura do que puidera ser, ben o supermercado, ben o centro cívico e a total ausencia de vivendas.

V Trofeo Teresa Herrera de atletismo no Estadio Municipal de Riazor

Praza de Catro Camiños coa fábrica de Estrella Galicia

Estrella Galicia

... e -na marxe esquerda- coa estación de servizo proxectada por Antonio Tenreiro, cun dos trolebuses procedentes de Londres e... coa fonte sen funcionar como rotonda: boten ben unha ollada a eses coches a circular na mesmo sentido a un e outro lado da fonte.

Baluarte de San Carlos e Castelo de San Antón

I Catálogo da colección de postais do arquivo do Concello da Coruña

O Día das FF. AA. españolas de 1985 (vídeo)

Si, xa tiñamos unha e dúas imaxes en cor dese día de 1985. Porén, cando empezamos este blog non había a cantidade de material a circular polas Redes que hai máis dun lustro despois e así, podemos completar hoxe aquelas instantáneas de Alberto Martí con este vídeo que atopamos hai pouco en Yoube:

Ademais, gústame sorprender á xente máis nova que coñezo coa historia do magnicidio que planearon para ese día.

O Lavadoiro Hixiénico en Fernández Latorre

Pedro Ferrer | A Coruña de Pedro Ferrer; Ed. Xerais

Pouco ou nada sabemos deste Lavadero Higiénico situado na Rúa Fernádez Latorre. É posíbel que a cheminea que se pode ollar na parte dereita sexa a da fundición Wonenburger mais iso xa son especulacións.

A miña avóa ten contado que ela ía lavar (décadas despois de que se tomara esta imaxe) a outro lavadoiro sobre o río de Moinelos ao que tamén había que acceder por un edificio, ao estilo deste. Haberá por aí algunha foto de tan singular construción? 

Levamos arredor de mil imaxes publicadas e aínda fincan unha chea de interrogantes...

Coruña en 1928

"Un viaje por Galicia" (Luis R. Alonso 1928). Arquivo do CGAI.

O lavadoiro público de San Carlos

Pedro Ferrer | A Coruña de Pedro Ferrer; Ed. Xerais

En 1893 rematou a construción deste lavadoiro público no Parrote, ao pé da muralla do Xardín de San Carlos. Fornecíase dun ramal procedente da próxima Praza da Constitución. Foi o lavadoiro que serviu para satisfacer a grande demanda da Cidade Vella, tamén chamada Cidade Alta.

___________________________________________

Fonte: http://www.lavaderospublicos.net/2013/01/lavadero-publico-del-parrote-la-coruna.html

Teatro Linares Rivas

Pedro Ferrer | A Coruña de Pedro Ferrer. Ed. Xerais

Este fermoso teatro obra de Leoncio Bescansa foi estreado en 1920 e non chegaría aos vinte anos de existencia, a finais da década seguinte foi derrubado para erguer, pese as dificultades da época, o flamante e moderno edificio do Cine Avenida, proxectado por Rafael González Villar.

Adeus Castiñeiras!

Alberto Martí | La Voz de Galicia

Na imaxe pódese ollar o imparábel avance das obras de  prolongación da Avenida de Alfonso Molina desde a zona das estacións até practicamente a Praza de Ourense.

No momento de tirar a foto aínda non se construíra a ponte que permitiría evitar o cruce ao mesmo nivel do gran novo acceso con Juan Flórez mais permite adiviñar, se fixamos a vista ás casiñas da dereita, a magnitude das expropiacións que se tiveron que levar a cabo para sacar adiante os traballos.

Tal foi así que un barrio practicamente enteiro, o de Castiñeiras, desapareceu baixo os cascallos (moitos dos seus habitantes foran reubicados no novo Barrio das Flores) para dar paso ao que hoxe é o comezo da Ronda de Nelle, os xardíns da Praza de Catro Camiños e, por suposto, a avenida de Alfonso Molina.

A Praza de Pontevedra en 1957

Alberto Martí | La Voz de Galicia

Exactamente no cruce coa Rúa Santo André, visto desde algunha altura en Juana de Vega. O tranvía non sabemos se vai ou vén das cocheiras (no fondo á dereita das Escolas E. da Gurada), o que si é curioso é velo compartir espazo cun trolebús.

Moito mudou ese recuncho, aos poucos anos as Escolas E. da Guarda volveron prestar servizo docente até o día de hoxe, as cocheiras foron derrubadas e no seu lugar se ergue hoxe unha delegación da Facenda estatal, o predio de galerías tamén foi derrubado e na actualidade hai un hotel da cadea Zenit, a calzada pola que se ven os carrís do tranvía é un espazo peonil (os automóbiles  circulan baixo falso túnel) desde a década de 1980 que xa foi anovado na primeira década do século XXI, ...

Desfile militar polo Cantón Grande en 1940

Alberto Martí | La Voz de Galicia

Ao fondo, na esquina superior esquerda, pódese ollar adiviñar o edificio de Correos sen o Teatro Colón diante xa que daquela aínda non fora construído.